13 мая 2019

Јаан да, јаш та бу кӱнниҥ учурын баалап ла тооп, Улу јеҥӱниҥ кӱнине учурлалган парадта кӱӱнинеҥ турушкан. Тӧрӧл јеринечындык болорына темиктиринип турганын керелеп, Балыктујул, Саратан, Улаган ла Кара-Кујур јурттардыҥ јуучыл-паттриотик алык клубтарда јӱрӱптурган балдар јуулган улуска јуучыл билгирин кӧргӱсти. 1941 јылда кенетийин, билдиртӱ јогынаҥ табаруэдип башталган Ада-Тӧрӧл учун Улу јууга бистиҥ аймактаҥ 1346 кижи атанган. Олордыҥ ортозынаҥ 730 кижи јеҥ јастанган, 378 кижи орды-суруузы јок јылыйган, јӱкле 256 кижи Алтай јерине јанган.

Улаган аймакта бӱгӱнги кӱнге јетире эзен-амыр отурган јууныҥ туружаачыларынаҥ јаҥыс Кудюшев Георгий Данилович артканын темдектебеске болбос. Анайда ок Улу јуу ӧйинде бала тужы болгон ӧрӧкӧндӧргӧ, ветерандардыҥ тулартып, эзен јӱрген эш-нӧкӧрлӧрине, тылдыҥ ишчилерине – Ада-Тӧрӧл учун Улу јууга камаанду болгон улустыҥ ончозыныҥ алдына јаанбыйанын јетирип, олорды тоопло баалап јӱргенин темдектеп, аймактыҥ јааны В.Б. Челчушев, «Улаган аймак» муниципал тозӧмӧлиниҥ депутаттар Совединиҥ председатели Н.А. Санин, Государстволык јуун – Алтай Республиканыҥ Эл Курултайыныҥ депутады А.И. Тазрашев, Улаган јурт јеезениҥ јааны А.М.Токоеков,Улаган аймактыҥ комиссариадыныҥ јааны К.Л. Богданов уткуулду ла быйанду сӧстӧрин айткандар

Улу јеҥӱниҥ  кӱни – ол тӱӱкилик учурлу кӱн. Оны бистиҥ ороонныҥ кӧп тоолу албатызы кыйын-шырага бастырып, јӱрӱминиҥ, су-кадыгыныҥ баазыл аалып чыкканын эске алынза, сӱӱнчиле карыкчал биригип, кӧстиҥ суузы ачу да, тату да болоры јарт.Онойып, кату ӧштӱниҥ кенетийин табарганы, оныҥ салтары јаҥыс та албаты-јонныҥ эмес, анайда ок ар-бӱткенниҥ де санаазында јарт артып калгандый – быјыл кӱӱк айдыҥ 9-чы кӱнинде ай-кӱн Јеҥӱге сӱӱнгендий айас та болгон болзо, от-калапту јууныҥ тыныжы 74 јылды ӧткӱре алтап, кӧк айастыҥ тӱбинеҥ келген соок эзиннеҥ билдиртти.